अनुभवी, तज्ज्ञ डॉक्टरांकडून तपासणीसह मार्गदर्शन
जळगाव : मोठया माणसांप्रमाणे लहान मुलांनाही दमा होऊ शकतो. याला बाळदमा म्हणतात. यासाठी पोट उडणे, डबा, इत्यादी नावेही आहेत. बाळदमा वयाच्या सहा महिन्यांनंतरच येतो. अशा बालदम्यावर डॉ. उल्हास पाटील वैद्यकीय रूग्णालयात निदान आणि उपचाराची सुविधा उपलब्ध आहे.
सहा महिन्यांनंतर येणारा दमाही दोन प्रकारचा असतो. पहिल्या प्रकारचा बाळदमा पाच वर्षानंतर आपोआप नाहीसा होतो. मात्र दुसरा प्रकार पाच वर्षानंतरही टिकून राहणारा असतो. बाळदमा असणार्‍या बाळाच्या रक्ताच्या नातेवाईकांत (आई, वडील, भाऊ, बहीण, काका, मामा, मावशी, आत्या, आजोबा, आजी, इ.) दम्याचा विकार असल्यास त्या बाळाचा दमा कायमचा विकार होण्याची शयता असते. पन्नास टक्के बाळदम्यांमध्ये आनुवंशिकता हे कारण असते.र वावडे, विषाणुदाह, राग-दु:ख, इत्यादी भावना यांमुळे अशा मुलांना दम्याची सुरुवात होऊ शकते. आनुवंशिक नसणारा बाळदमाही वावडे (धूळ, परागकण, दमट हवा ) किंवा फुप्फुसाच्या विषाणुदाहामुळे होऊ शकतो. दम्यामध्ये श्वासनलिका अरुंद होणे, आतल्या आवरणाला सूज येणे आणि चिकट पाझराने बेडका तयार होणे या तीन प्रमुख प्रक्रियांमुळे हवेचा मार्ग अरुंद होतो. यामुळे श्वसनास जास्त श्रम लागतात. यामुळे धाप लागणे, श्वास वेगाने चालणे, खोकला, इत्यादी लक्षणे दिसतात.
लक्षणे आणि चिन्हे
बालकाला सर्दी, शिंका अशा त्रासाने सुरुवात होते, यानंतर श्वास घेणे अवघड होऊन छातीचा आवाज यायला लागतो, श्वसन उथळ आणि जलद होते, नाकपुड्या फुलतात, मूल मोठे असेल तर छाती दाटल्याचे सांगते, खोकल्याची मधून मधून उबख येते, श्वास सोडताना शिट्टीसारखा आवाज येतो, बाळदमा अधून मधून येतो. मात्र दरम्यान मुलाची तब्येत ठीक-ठाक असते, लहान वयाची बालके बाळदम्याच्या श्वसनाच्या त्रासाने रडतात, दम लागल्याने पोट उडताना (हाबके मारताना) दिसते.
जास्त त्रास असल्यास ओठ आणि हाताची त्वचा निळसर दिसते.
त्वरीत साधा संपर्क
बाळदम्याचा पहिलाच प्रसंग असेल तर बाळाला ताबडतोब डॉ. उल्हास पाटील वैद्यकीय रूग्णालयातील बालरोग तज्ज्ञांकडून तपासणी करून घ्या असे आवाहन रूग्णालय प्रशासनातर्फे करण्यात आले आहे.
