जळगाव : डॉ. उल्हास पाटील रूग्णालयाच्या हभप जगन्नाथ महाराज अंजाळेकर नेत्रालयात नेत्रविभागाने अल्पावधीत उल्लेखनीय यश संपादन केले आहे. विभाग प्रमुख डॉ. एन.एस. आर्विकर यांच्या कुशल मार्गदर्शनाखाली, नेत्रतज्ज्ञांच्या समर्पित टीमने महिनाभरात १५० मोतिबिंदू शस्त्रक्रिया यशस्वीरीत्या पूर्ण केल्या. या शस्त्रक्रियांमध्ये आधुनिक फेको तंत्रज्ञानाचा वापर करण्यात आला. ही पद्धत सुरक्षित, वेदनारहित व लवकर बरे होणारी असल्याने रुग्णांमध्ये विशेष पसंतीस उतरली आहे. ग्रामीण व आर्थिकदृष्ट्या दुर्बल रुग्णांसाठी ही सुविधा अत्यंत उपयुक्त ठरली आहे. रुग्णालयात येणार्‍या रुग्णांची पूर्व तपासणी, शस्त्रक्रिया व नंतरची देखभाल यासाठी एक संगठित कार्यपद्धती तयार करण्यात आली आहे. वैद्यकीय महाविद्यालयाचे संचालक तथा विभागप्रमुख डॉ. एन.एस. आर्विकर यांच्या नेतृत्वाखालील नेत्रविभागातील डॉटर्स, ऑप्टोमेट्रिस्ट, नर्सेस व इतर सहाय्यक कर्मचारी यांनी या यशात मोलाचा वाटा उचलला आहे.रुग्णालय प्रशासनाकडूनही या उपक्रमासाठी आवश्यक साधनसामग्री व तांत्रिक मदत पुरवण्यात आली आहे. रुग्णांनीही उपचारानंतर समाधान व्यक्त केले असून, दृष्टी परत मिळाल्याचा आनंद त्यांच्या चेहर्‍यावर स्पष्ट दिसून येत आहे.
