डॉ. उल्हास पाटील रूग्णालयातील बालरोग शल्यचिकीत्सकांचे यश
जळगाव – डॉ. उल्हास पाटील रूग्णालयातील बालरोग शल्यचिकीत्सकांच्या तज्ज्ञ टीमने पुन्हा एकदा आपले कौशल्य सिद्ध केले आहे. जन्मत:च गुदद्वाराची जागा नसलेल्या एका नवजात शिशुवर यशस्वी शस्त्रक्रिया करून त्या बालकाचे प्राण वाचवण्यात आणि त्याचे आयुष्य सामान्य करण्यासाठी मोठे यश मिळवण्यात आले आहे.
याबाबत माहिती अशी की , पाचोरा येथील अश्विन बारेला यांच्या पत्नीची प्रसूती झाली. प्रसूतीनंतर जन्मलेल्या शिशुच्या पोटात असामान्यरीत्या सूज दिसू लागली. शिशुचे पोट फुगत असल्याने पालकांनी तत्काळ त्याला डॉ. उल्हास पाटील रूग्णालयात दाखल केले. प्रारंभी तपासणीत शिशुची प्रकृती अत्यंत गंभीर असल्याचे आढळले. यानंतर बालरोग शल्यचिकीत्सक डॉ. मिलींद जोशी यांनी सखोल तपासणी केल्यावर शिशुला ‘अ‍ॅनोरेटल मालफॉर्मेशन’ (जन्मजात गुदद्वार विकृती) असल्याचे निदान झाले. या विकृतीमध्ये शिशुच्या शरीरात मल विसर्जनाचा मार्ग नैसर्गिक स्वरूपात तयार होत नाही, त्यामुळे पोटामध्ये वायू आणि मल साठून पोट फुगते आणि स्थिती जीवघेणी होऊ शकते.
तत्काळ पहिली शस्त्रक्रिया
शस्त्रक्रिया विभागाचे प्रमुख डॉ. शिवाजी सादुलवाड यांच्या मार्गदर्शनाखाली तत्काळ बालरोग शल्यचिकीत्सक डॉ. मिलींद जोशी यांनी टीमसह शिशुची पहिली शस्त्रक्रिया करण्यात आली. अत्यंत दक्षतेने अ‍ॅनोरेटल मालफॉर्मेशन पध्दतीने पहिली शस्त्रक्रिया करण्यात आली, ज्यामध्ये तात्पुरत्या मार्गाने मल विसर्जनाची सोय करण्यात आली. शस्त्रक्रियेनंतर शिशुचे पोट हळूहळू फुगणे थांबले आणि त्याची प्रकृती सुधारू लागली.
दुसरीही शस्त्रक्रिया यशस्वी
काही आठवड्यांनंतर शिशु स्थिर झाल्यानंतर दुसरी महत्त्वाची शस्त्रक्रिया ‘एनोडटल मालफॉर्मेशन रिपेयर’ यशस्वीरीत्या पार पडली. या शस्त्रक्रियेत गुदद्वाराचे योग्य स्थान तयार करून नैसर्गिक मल विसर्जनाची प्रक्रिया पुनर्संचयित करण्यात आली. या गुंतागुंतीच्या प्रक्रियेनंतर शिशुचे पोट पूर्णपणे नियमीत झाले आणि त्याची आरोग्यस्थिती समाधानकारक आहे. बालरोग शल्यचिकीत्सक डॉ. मिलींद जोशी, डॉ. वैभव फरके, डॉ. शुभम कालरा, डॉ. ऋषिकेश कुळकर्णी, भूलशास्त्र तज्ज्ञांमुळे ही शस्त्रक्रिया यशस्वी ठरली. डॉ. उल्हास पाटील रूग्णालयात अशा गुंतागुंतीच्या शस्त्रक्रिया नियमितपणे केल्या जात असून, नवजात शिशुंसाठी येथे अत्याधुनिक सुविधा उपलब्ध आहेत.
कोट…
जन्मत:च काही शिशुंना गुदद्वाराची समस्या असते. अशा परीस्थितीत कुटूंबाने घाबरून न जाता त्वरीत डॉक्टरांचे मार्गदर्शन घेतले पाहीजे. जेणेकरून शिशुवर तातडीने उपचार करणे शक्य होते. डॉ. उल्हास पाटील रूग्णालयात अशा शिशुंवर यशस्वीरित्या उपचार केला जातो.
– डॉ. शुभम कालरा.
