डॉ. उल्हास पाटील रूग्णालयात करून घ्या तपासणी
जळगाव : उन्हाळ्याच्या काळात किंवा श्रमदायक काम करताना येणारा घाम ही नैसर्गिक शारीरिक प्रक्रिया असली, तरी अतिघाम येणे म्हणजेच हायपरहायड्रोसिस हा एक गंभीर आरोग्याचा संकेत ठरू शकतो, असा इशारा वैद्यकीय तज्ज्ञांनी दिला आहे.शरीरातील तापमान नियंत्रणासाठी घामाचे स्त्रवण आवश्यक असते. परंतु काही व्यक्तींना अगदी थोड्या श्रमात, किंबहुना थंड वातावरणातही अतिप्रमाणात घाम येतो. हात, पाय, बगल, चेहरा या भागांतून सतत वाहणारा घाम केवळ त्रासदायकच नाही, तर भविष्यातील अनेक आजारांची पूर्वसूचना असू शकतो
अतिघाम येण्याची मुख्य कारणे म्हणजे शरीरातील हार्मोनल असंतुलन, थायरॉईड ग्रंथीतील बिघाड, मधुमेह, चिंता, स्थूलता तसेच काही न्यूरोलॉजिकल विकार असू शकतात. काही वेळा औषधांच्या दुष्परिणामामुळेही घामाचे प्रमाण वाढते.तज्ज्ञांच्या मते, अतिघाम येणे हे फक्त शारीरिक नाही तर मानसिक तणावाचेही द्योतक आहे. सतत घाम येण्यामुळे व्यक्तीला सामाजिक आणि व्यावसायिक जीवनातही अस्वस्थता जाणवते. हातातून सतत घाम येत असल्याने हस्तांदोलन, कागदावर स्वाक्षरी करणे, मोबाईल वापरणे अशा दैनंदिन गोष्टी कठीण बनतात. अशा रुग्णांनी प्रथम स्वतः निदान न करता तज्ज्ञांचा सल्ला घ्यावा. रक्तातील साखर, थायरॉईड, लिव्हर फंशन, तसेच इलेट्रोलाईट तपासण्या करून घाम येण्यामागचे मूळ कारण शोधणे गरजेचे आहे. त्यानुसार औषधोपचार, बोटॉस थेरपी, आयोनोटोफोरेसिस किंवा काही प्रकरणांमध्ये शस्त्रक्रियाही केली जाऊ शकते.
डिहायड्रेशनचा त्रास
घामामुळे शरीरातील पाणी आणि मीठांचे प्रमाण कमी झाल्यास डिहायड्रेशन, थकवा, भोवळ, आणि हृदयाच्या गतीत अनियमितता अशी लक्षणे दिसू शकतात. त्यामुळे भरपूर पाणी, फळांचे रस, इलेट्रोलाइट्स घेणे आणि अतितापमानात श्रम टाळणे आवश्यक आहे.सार्वजनिक आरोग्य विभागाच्या अहवालानुसार, मागील काही वर्षांत अतिघाम येणार्‍या रुग्णांची संख्या सातत्याने वाढत आहे. हवामानातील बदल, तणावयुक्त जीवनशैली आणि डिजिटल युगातील दीर्घकाळ स्क्रीनसमोर बसण्याची सवय यामुळे ही समस्या वाढत चालली आहे. तज्ज्ञांचा सल्ला असा की, अतिघाम येणे हा त्रास किरकोळ समजू नये. यामागे लपलेले रोग वेळेवर ओळखले नाहीत तर भविष्यात ते हृदयरोग, मूत्रपिंड विकार किंवा तंत्रिका तंत्राशी संबंधित आजारांमध्ये रूपांतरित होऊ शकतात.
